استعرض مصدر ويكي:المعتكف الأول - أكتوبر 2020/توثيق نصي للنقاشات

====اليوم الاول: 7 اكتوبر، الاربعاء. الجلسة الاولي: 7-9 ليلا====

جلسة مراجعة (سياسات التحرير - مشاكل تقنية -  طرق التواصل/العمل/الاجتماعات - تقسيم المحتوي)

حاضرات: زعزع - كريم - عبدالرحمن - روان - ريم - أية - أبو طيرة - برهام - عمر طوانسي - رنوة - أمنية

- بدأنا بتعريفات عن نفسنا وعلاقتنا بالويكي حتي الان. 

-روان: في علاقتها بالويكي حاسه بتوهان شويه، انه فين المصارد للشخصيات اللي هي عايزة تكتب عنها، معرفتش تزبط ايه المصادر اللي يمكن الاعتماد عليها. في احساس ان الموضوع كبير.

-ريم: من شهر تقريبا اتكلمنا في انه مفيش تنظيم للداتا اللي بتتحط وتنسيقها، الصفحة الرئيسية هايلة، وبشكل ما عملت هيكل منطقي وجواها هياكل اصغر مفيدة، انا مرتاحة اشتغل علي مشروع معين، ومتعاملة مع ده وشغالة. 

- عمر: انا الحقيقي مش مشتبك مع الويكي لحد انهاردة، فمعنديش جديد في اللحظة الحالية. 

- أية: مركزة مع صلاح علي فهرس الكتب والارشيف.

-مروه: معنديش علاقة واضحة مستمرة مع الويكي، دايما متحمسة لكن لاسباب كتيرة لسه مشتغلش، ولما دخلت حسيت اني عطلانة تقنيا وشويه كسل كمان، حضرت كذا اجتماع واتناقشنا في حاجات ليها علاقة بتنظيم الداتا، واتمني نتناقش في المعتكف في ده اكتر انه ازاي تتنظم الداتا بحبث يستفاد منها الباحثين.

-عبد الرحمن: وقعت من الويكي فترة طويلة، هاسمع معظم الوقت، بس هاحاول اسمع واتناقش معاكم في الاخر. 

-أمنية: شغالة علي الكتب اساسا.

-برهام: مش بادخل علي الويكي بشكل منتظم، شغال عادة علي الكتب والمصطلحات، مش بانظم الحاجات اوي، وبادخل ارمي الحاجات لحد ما حد ينظمها. قرايتي للروايات بتخليني ادخل المعلومات اللي عندي، ومهتم جدا اعمل لستة للي باقراه واشوف ممكن تشتبك مع الويكي. علاقتي بالويكي هتفضل اني بارمي مثلا مصطلحات، ونكمل سوا. 

-طيرة: وقعت من المشروع في اخر شهرين، باشتغل شبه برهام، القوالب طريقة لسه مش عارف اشتغل بيها. بعض الاتفاقات بتكون منطقية لكن بانسي بعد كده. احيانا باكون عايز احط حاجة بسرعة، لكن باضطر اقعد اذاكر عشان اقعد احطها مما بيصعب عليا. 

-رنوة: مساهماتي في الويكي ضعيفة جدا، لاني عادة مسئولة عن توثيق كل اللي بيحصل في المؤسسة. اضف مهتمة جدا وبتحاول بكل الاشكال الممكنة الاسهام للويكيهيات وانتاج المعرفة. 

-زعزع: باشارك بشويه مشاكل زي ازاي نخلي التنظيم افضل، المشاكل التقنية باعطل برضه قدامها، معرفش افتح واسيب حاجة مش خلصانة. ودوري في الويكي بشكل اساسي، هي متابعة هيكلة المشروع وتنظيم الورش.

-كريم: انا اكتر مهتم بتنظيمنا كمجموعة من العمرانيين، ونكون كمان يكون معانا ناس من خلفيات مختلفة، عندي فضول شديد تجاه موضوع المصطلحات، واول خطوة هو الانتاج وبنتعلم عمران مع بعض، الويكي بتسمحلنا بمساحة جديدة ومختلفة ونفكر بمشروعات مختلفة، ممكن نوظف الويكي كمكتبة ولا حاجات تانية، وبنربط ازاي الموضوعات ببعض. وازاي ممكن نشكل مجموعة مترابطة.

-برهام: هل ممكن نخلي الويكي مكان للحوار حوالين المصطلحات؟ بس لحد دلوقتي الويكي مش مكان للاشتباك؟

-كريم: في حاجات بديهية ممكن نبدأ بيها ولسه معملناش كده؟ زي فتح نقاش حول مصطلح العمران، او القاهرة .. الي اخره. 

-زعزع: كلنا لسه بنفكر ومش متاكدين عايزين نشتغل علي ايه، او مش مشاركين بعض اننا نبقي شغالين في نفس الموضوع فنبني سوا ونكون اهتمامات مشتركة.

-برهام: قد ايه المعتكف ممكن يعمل كده؟ يعني يجمعنا علي بعض. الكتب والمصطلحات مسمعة في بعض ويمكن نتفق علي مجاميع عمل ثانية. 

-عبدالرحمن: الفترة الاخيرة شغال علي كهربا النقل، وباقرا عنهم اخر فترة، لما بادخل ع الويكي مش باحس اني المفروض اضيف الدخلة الجديدة ولا لا. هل ده ارتباك البدايات ولا ده محتاج تنسيق؟ كنت مهتم اوي بموضوع الخرايط في الاول، وكأن المكان في الويكي يعتبر ده قاعدة بيانات. هدف استراتيجي انه يكون في قاعدة بيانات بالعربي وهيجمع قاعدة مهتمين بالعمران، من طلبة عمارة، او طلبة دراسات عليا وهكذا. وقيمته مهمة اوي لانها معلومات خام ممكن الناس تستخدمها زي ما هي عايزة. 

- برهام: نسمع من أية.

-أية: طريقة عمل المجموعة كمحررين؟ هل في خطة عمل واضحة ولا ولا؟ ازاي نبقي بنبني علي شغل بعض؟ الهدف من الويكي؟ تجربة ويكي الجندر في الشغل، بدينا زي ويكي عمران، بعدين بنينا في خطين مختلفين، في خطة ماشيين عليها، وفي نفس الوقت كل ما الاقي حاجة بارفعها، وعمرك ما هتعرف الحاجات مهمة ولا لا الا لما تطلع ع الويكي. موضوع التراكمية مش هيجي غير لما نرمي شغلنا. في خط فاصل بين الدرافت وبين الصفحة المتكاملة. لقيت بعد ما بديت شغل انه مفيش فرق، طول الصفحة او قصرها مش مهم، وهتفضل الصفحة قد التطوير. نبص ع الويكي كأنها مخنا، ونسيب الافكار تتخمر ويتبني عليها بعد كده. 

-كريم: احنا بدينا من نقطة اننا بنعمل شئ شبه ويكي جندر ونبني فهرس وهكذا، هل محتاجين نبعد عن ده شويه.

-مروه: الاجتماع اللي اتقال فيه موضوع المشاريع، ابتدت بحاجة عامة عن مشروع معين، وبعدين اتحولت بعد كده لمشاريع، ومكنتش تحجين قد ما هو كان في اتنين تلاتة عايزين يتكلموا عن الجائحة. والتلقائية في الشغل ممكن تبقي مؤذية لو حد معندوش اهتمام بحاجة هيعطل يعمل ايه. وعليه السكتين لازم يكونوا موجودين ومتاحين. اللي محتارة فيه، هل نبقي استراتيجين اصلا في عايزين نوصل ايه للويكي واتاحة معرفة عامة في الويكي وانهم يبنوا سرديتهم بنفسهم، بس اتاحة المعرفة وبني المعرفة بشكل جماعي. وازاي نوصل لده واحنا مش هيكيلين بشكل ما. بس هل محتاجين نعمل ده دلوقتي ولا لا. هل الويكي مكان لانتاج المعلومات ولا للتفاعل مع الاحداث؟ 

-زعزع: والمواضيع المؤرقة لده انهاردة، ازاي هنعلن عن الويكي وازاي هيطلع للناس، وده بيخلي المواضيع اللي حاصله ع الارض وممكن يكون موضوع ع الويكي بيحفز للحركة

-كريم: بنرجع تاني للسؤال عن احنا بنعمل ايه؟ هل بنتيح معلومات للناس تبني عليه، ولا عايزين نفضل في مستيو غير مرئي. 

-مروه: انا مش مهتمة اوي الويكي تطلع، قد ما بتحقق الهدف اللي احنا بنتفق عليه. المجموعة دي بس توصل بالويكي لمرحلة، انه ممكن يتكتب بيه بحث او مقالة رأي او هكذا. فلو المجموعة اللي قاعدة كلها بتستعمل الويكي كقاعدة معرفية. 

-أمنية: هنعمل ايه؟ الانتاج المعرفي كطريق. ولا نقدر نعمل مجموعة ضغط، ولا نطرح نقاش عام علي مواضيع تمسنا.

-برهام: انتاج معرفي بالتراكم، دي الويكي بالنسبالي. مشروع مثلا الاثنوجرافيا البصرية، وباصمم صفحة ع الويكي واركز فيها. وممكن حاجات تلقائية وبارمي حاجات حسب مساري وقراءاتي. ممكن كل واحد فينا يتكلم انه ازاي يكون عنده مشروع خاص جدا ع الويكي. السحب للنقاش: تخيلت انه يمكن هنعمل ده بشكل تلقائي. ولكن ممكن نقول لبعض ويمكن نشد بعض ليه. ومش متأكد ازاي نسحب بعض للنقاش. هل في طريقة تانية.

-رنوة: ليه سؤال أمنية انه كأن عندنا ٣ مسارات، والمجموعة المتكونة دلوقتي بمجهود ٦ شهور، وفي أمل ان الحاجات تكبر وتتوزع وتنمو في مسارات مختلفة. وعليه مش لازم خالص يبقي في مسار واحد. وعليه زي ما برهام بيقول انه كل واحد عنده مشروع شخصي وممكن يشارك ناس تانية فيها. والموضوع اللي أمنية قالته بتاع حذف بعض الامور للامن الشخصي للناس، ليه؟ وممكن نتكلم مع بعض فيه؟ 

-عبد الرحمن: تعريفنا بهنعمل ايه مهم نسبيا دلوقتي، التمثيل بتاعنا مهم لروح شغل ويعني مسئولية، وعليه لو في ناس بتحدد الشكل ده والتمثيل ده بحضورها وموافقتها. وعليه الاتفاق علي شكلنا مهم.

-زعزع: هل بعد ١٠ سنين نفس المجموعة دي اللي بتنتج؟ اكيد لا هتبقي ناس تانية. 

-عبد الرحمن: لو الناس حتي عندها نفس المبادئ ونفس الخبرات، هيفضل عندنا اسئلة حوالين ايه هي المجموعة وتعريفها. 

-مروه: اسئلة: أمنية وحجازي رد فعل علي ايه؟ باستثناء الفعاليات العامة ايه ممكن يبقي الخطر؟ احنا معندناش صفحة من نحن. فايه المخاطر اللي هتطلع من التمثيل؟ وسؤال لاية: في نفس النقطة دي، مش متخيلة موضوع التمثيل، بس عندي تخوف اننا بنعمل تثبيت لمستوي الحوار للويكي نفسها. فهل المجموعة بتحط (التون) وبعدين اللي بيجي بيكمل. 

-أية: مش شايفة الموضوع تمثيلي تماما، لكن محتاجين نحط اطار وبيكون مفيد عشان نعرف نشتغل. فهل انا هاعمل فعاليات ولا لا. باشوف انه صفحة عن ويكي عمران مهمة جدا وبنراجع نشوف فيها احنا مين، وبيفكرنا احنا نفسنا بالاهداف. فموضوع الاطار مهم، هل المجموعة الاولي بتحط قواعد، لا تماما، الاطار والمنهجية واللغة بيتغير بالوقت والناس الموجودين. هل الانتاج المعرفي سياسي ام لا؟ وايه نوعيات المخاطر اللي ممكن نخوضها. في ناس ممكن تختار تبقي مجهولة علي كل شغل الويكي. 

-كريم: مكنتش اقصد ايدولوجية واضحة وصريحة، في وقت ما من الاوقات كان في مساحة حركة، ومعرفة ان يعني ايه التنمية العمرانية للمجموعة الموجودة دلوقتي هيتبع منهجية ما ومش هنتخانق عليه، وعليه لو في وقت عندنا مساحة نقدر نرجع لقاعدة ما. مفيش شئ مضمون، مش مضطرين نعمل افعال مباشرة نتلم فيها او بيها. 

-عبد الرحمن: في صفحة ع الفيسبوك اسمها سكك حديد مصر، بيتكلموا علي فساد مستمر، فيهم طبقات مختلفة قفش، وحصل مشكلة علي الموضوع. 

-زعزع: فرضا، لو عملنا صفحة مثلا للتصالحات ونعمل صفحة اشكالية، وجودها هيعمل مشكلة. مين اللي هيحصله مشكلة. اضف و ١٠ طوبة. 

-أية: المخاطر موجودة، والتساؤل مهم. مين الشركاء والمسئولين؟

-كريم: في جلسة عن احنا مين هنتكلم فيها عن ده بالتفصيل. 

-عمر: لسه احنا مش متفقين عن تخيلنا عن الويكي بعد سنة، احنا وعشرة علينا، ولا كل الناس، ولا احنا بس؟ 

-برهام: الانتاج المعرفي سياسي وده مهم جدا. التعريف بتاع التطوير العمراني مهم اوي لطرح نقاشات واولويات مختلفة تماما. هل دي السكة اللي احنا عايزنها؟ عايزين نعرف احنا عايزين نشتبك مع ايه؟ احنا متخيلين ويكي ازاي؟ اقل من خمس سنين، تبقي عند الخلق كلها. ليه نرسم مسار طويل ممكن منكونش طرف فيه. 

-عمر: يعني ممكن يبقي فيه قاعدة نتحرك منها، وتخلي فئات معينة من الاشخاص مش هتشارك في ده. هل في وقت ما هتسيب المؤيدين لمشروع ما بشكل ايجابي عن الحكومة؟ ولا لا؟ وهتتحكم ولا لا؟ 

-برهام: هل عايزين ناخد المصطلحات والتعريفات سكة لخط ما؟ وعليه اللي بيدخل بيشوف ان في سكة او ايدولوجية واضحة وموجودة. 

-طيرة: بالأكيد احنا مش حركة، والانتاج المعرفي سياسي بالتأكيد، واكيد فيه ايدلوجية واضحة بشكل او بأخر. واكيد ممكن ناس تدخل تعرف الحاجات بطريقتها، مش مشكلة هيفضل فيه سرديات مغايرة. 

-مروه: هل في مقال رأي - او تعليق؟ ازاي نشتبك معاها؟ مش هنطلع بيان بس الشكل اللي هتخرج بيه مقال الويكي. 

-زعزع: مجرد حط المعلومات والارقام بتقل حاجة من غير طرح ولا شتيمة ولا رأي واضح.

-برهام: وتفضل المعلومات زي ما هي ونشوف هتروح فين

-أمنية: اه نحط المعلومات واتقال ده في سياسات التحري في مارس ٢٠٢٠، وميكونش فيه رأي تماما. بس المعلومات تفضل متاحة، وان ممكن توثيق للخطابات المختلفة بين الحكومة والرأي المغاير جوه صفحات المشاريع مثلا. 

-مروه: نفعل صفحات النقاش؟ 

-زعزع: في تاريخ الصفحة، وفي صفحة النقاش اللي عليها نقاش للتعديلات وهكذا. 

-برهام: هل قبل ما اعدل، لازم اناقش تعديلي الاول، ولا اعدل علطول؟

-رنوة: عدل طبعا.

-عبدالرحمن: اه في مواضيع بتبقي بس كأنها صفحة كتاب وهكذا، وعليه بيكون فيه اطروحة والقارئ مش بيكون شايف النقاش ورا المكتوب.  موضوع الريف بالنسبالي مهم جدا وشايفه مش واخد اهتمام تماما.

-مروه: نطلع بانه ايه نوع الادوات، وممكن ترميلها صفحات او نعمل نقاش جانبي ازاي تطور، لانه شئ طموح جدا اللي عبد الرحمن عايزه في فكرة التشبيك لمواضيع جديدة.

-برهام: المناقشات بتجبيلي افكار لمهام، لما اتكلمنا عن الكباري، لقيت انه في صفحة لكتاب جين جاكوبز، في فصل ضخم عن نزع التنوع عن المدينة بالكباري والطرق. فمش بس المصطلحات، بس كمان الكتب وهكذا. انا بس باحاول افكر في المسارات الحرة وازاي المسارات تتقاطع.

زعزع ورانا صورة فيها تقسيمة لتوجهات العمران الرسمي وبرهان علق انه محتاجين نربط بين التقسيمة دي بالعرض. 

-زعزع: تربيط قضية بكتاب بمشروع بفيلم وصفحة كمان عن التنمية العمرانية بامريكا وهكذا، طول الوقت في روابط مختلفة ومتعلقة بكل صفحة. 

- أية: الجلسة في ساعتين كان مهم جدا، بس مهم يكون في جلسة يكون من نحن والفئة المستهدفة. وجلسة اخر المعتكف اللي هتصب في خطة العمل. 

-أية: الجلسة التقنية بكره ايه اولويتها؟

-ريم: اي حد قابل مشكلة، يقولها ونشوف نحلها ازاي؟ 

-زعزع: ازاي نفعل الروابط الداخلية مثلا شئ مهم

-رنوة: ممكن نعمل ورقة وكل واحد يكتب هو عايز يشتغل علي ايه، والناس تبدأ تشتغل عليها. 

-أية: يبقي متفقين نبتدي اليوم بجلسة عمل تقنية سوا

-مروه: تعديلات علي جدول بكره، هنبتدي بجلسة عمل، وبعدين نكمل الجلستين التانيين في نقاشات.


====اليوم الثاني: 8 اكتوبر، الخميس. الجلسة الاولي: 12 ظهرا -2:30  مساءا====


- كانت جلسة عمل عامة لتذكر تفاصيل العمل التقنية علي الويكي. 

-عرضت أية وكريم ما تم التوصل اليه وفهرسته وازاي ان في صفحات مضللة، بمعني انها غير واضح هل هي صفحات هيتبني عليها في المستقبل ولا صفحات محتاجة تتحذف. 

-النقاش كان حوالين طريقتين للعمل اثناء الجلسة، اشخاص او مجاميع يبتدوا يبنوا علي الصفحات المضللة لو هم اللي ساهموا في انشاءها وعندهم افكار لكيفية تطويرها. وااطريقة التانية هو ان الناس تختار مواضيع وتبتدي تبني عليها صفحات عشان بس تفتكر ازاي بنشتغل علي الويكي، وايه المشاكل التقنية اللي محتاجين مساعدج فيها. 

-وده اللي تم فعلا والكل اشتغل علي صفحات مختلفة وبني فيها وحصل حالة من العمل لتذكر التقنيات وكيفية التعامل مع الويكي.

ت
المواضيع المطلوب العمل عليها في الجلسة التالية:
*كيفية تضمين مصادر
*كيفية تضمين القوالب والغرض من القالب
*إنشاء قالب جديد للمشروعات
*هيكلة الصفحات: مشروعات - مصطلحات - مناطق أو أحياء - أشخاص
*تصنيفات

====اليوم الثاني: 8 اكتوبر، الخميس. الجلسة الثانية: 2:45 - 5 مساءا====

-الجلسة تم المناقشة فيها حول موضوع المصارد والمراجع والفرق بينهم، وتم عمل سياسة لكيفية كتابتهم وتم توثيق ما تم الاتفاق عليه في [[ويكي:سياسات التحرير|سياسيات التحرير]].

-تم الاتفاق انه في احتياج لمناقشة التوثيق عموما في الويكي، هل بنضيف الرابط، هل بناخد صورة للصفحات، او بنحفظ نسخة بي دي اف من المقال مثلا، كان النقاش هدفه معرفة كيفية توثيق الروابط التي قد تختفي او تتغير مساراتها علي الانترنت. وتم تأجيل هذه النقطة لجلسة اخري عن التوثيق.

-تم تقسيمنا الي مجموعات اصغر لبدء مراجعة الهياكل و القوالب لكل الفهارس.

-مجموعة عدلت [[ويكي:نموذج صفحة فيلم|هيكل الافلام]]، واخري [[ويكي:نموذج صفحة شخصية|للشخصيات]]، واخري [[ويكي:نموذج صفحة مصطلح|للمصطلحات]]، واخري [[ويكي:نموذج صفحة مشروع|للمشاريع]].

====اليوم الثاني: 8 أكتوبر، الخميس. الجلسة الثالثة: 9 - 10:30 مساءا====

ريم: أنا شايفة اني باوثق. الهدف الأساسي التوثيق مانتجتش حاجة فيها تحليل
صلاح: حلو انها تفضل مفتوحة منحددش شكل المنتج المعرفي. احنا بنشتغل على انتاج معرفي في مجال العمران. بعض المحتوى هيكون توثيق وبعضه تحليل حسب الموضوع. 

أمنية: احنا مجموعة هدفها الانتاج المعرفي باللغة العربية في مجال البيئة المبنية (أو العمران - أشارت أمنية للصفحات البديهية ال لازم نشتغل عليها زي تعريف "العمران" عشان نقدر نقول احنا بنشتغل على ايه) 

برهام: ليه بنسأل السؤال "من نحن؟" هل للتمثيل "صفحة عن الويكي" ؟ أو لتحديد قواعد الشغل بيننا؟ 
برهام طرح سؤال التوسع، وهل تعريف من نحن بيتغير مع تغير المجموعة 

صلاح وزعزع: ايه هي الأهداف؟ 
-الانتاج المعرفي
- تمكين المحافظات 

حجازي: التشعب في التخصصات . اختلاف الويكي عن المواقع العمرانية، هو إتاحة وانتاج معرفة أولية (نص سوى) تمكن آخرين من التعلم وانتاج المعرفة بأنفسهم، زي اننا نتيح أدوات تمكن الطلبة من التحليل والانتاج المعرفي. 

أمنية: الوصول للباحثين والممارسين في مجال العمران في البلاد المتكلمة بالعربية، أي هدف التشبيك. لغة للحوار بيننا على اختلافنا واختلاف اهتمامتنا.
احنا نفسنا فئة مستهدفة اننا نطور معارفنا ونتناقش ونتكلم. 

صلاح: احنا مجموعة من المهتمين، نتفاعل على الويكي التي تمثل مساحة للنقاش وتطوير الأفكار بهدف انتاج معرفة عن العمران. لازم نفكر مرحليا، حاليا مش حاسس اننا بنوجه كلام لفئات أوسع زي الطلاب. الأهداف المستقبلية هي الانتشار وضم فئات أكبر للويكي. 

عبد الرحمن: الكلام اساسا علي الفئه المستهدفه - احنا نفسنا خبراتنا مختلفه, وقصدي ان الءلبة هم يكونوا من اللي بينتجوا معرفة مع الفريق الاساسيز 

أية: الاول في ةيكي جندر - كانةا المستهدفين هم اللي مهتمات - بعدين لقيت انه في مجموعة بنات في الصحرا الغربية عاملات مجموعة قراية عن الويكي - واخرين

كريم: هل من اهدافنا غير المتخصصين ولا لا؟ ولا بنكلم نفسنا؟

زعزع: في تنوع. يعني ممكن لو بنتكلم عن مصطلحات أو نظريات هيكون فيها مستوى تعقيد مطلوب، غير صفحات المناطق والشخصيات ال بتكون بسيطة ومباشرة وواضحة. احنا أصلا مختلفين ولغة علاقتنا 

صلاح: احنا محققين توازن بالفعل. احنا بنوصل لغير المتخصص بلغتنا وفي نفس الوقت بنحط المصادر وبنكتب بلغة منضبطة

برهام: القوالب مثلا أداة لتبسيط المعلومة لغير المتخصصة لانها بتقدم المعلومات الأساسية. الهيكل كمان بيقدم التعريف المختصر 

عبدالرحمن: نستغل سحر الهايبر لينك. يعني لحد دلوقت مافيش تعقيد في اللغة، التعقيد في مستوى التحليل والعمق. الهايبر لينك بيربط الموضوع البسيط بصفحات تانية ممكن تكون معقدة مش هايفتحها غير المهتم 

كريم: هل ممكن من الفئة المستهدفة تضم في وقت من الأوقات سكان المناطق اللي بنتكلم عنها مثلا فده ينعكس على المنتج؟ يعني غير المتخصصين فئات كتير ومش شرط دلوقت تكون كلها واضحة 

زعزع: ده وارد جدا لان من أهدافنا التشاركية 

آية: ملخص كلامنا ان مفيش فئة مستهدفة واحدة واضحة للمتلقي، كل الناس ممكن تقرا على الويكي. 

أمنية: إعادة فتح نقاش على نقطة ريم الأولى عن الفرق بين التحليل والتوثيق

ريم: التوثيق هو عرض حقائق أو معلومات من مصادر. بخلاف التحليل اني باضيف طبقة تحليل من عندي وأحط رأيي. 

أمنية: ايه فايدة اننا نعمل تحليل على الويكي؟ أنا مش شايفة له فايدة؟ 

آية: يعني التحليل بمعنى فتح نقاش أو مقارنة بين وجهتين نظر ده مالوش مكان على الويكي؟ 

أمنية وبرهام وزعزع وكريم

داير نقاش حوالين مستوى التوثيق مقابل التحليل المطلوب
الكل متفق على عرض جميع السرديات المختلفة المطروحة 

رنوة: الويكي انتاج معرفي منطقها مختلف عن الصحافة. ليه نحط رأي أو رواية مافيهاش معرفة هي محض تعريص؟ 

الاختلاف بين المتناقشين: هل نحط رأي أو بيان statment  ؟ هل صوتنا يبان ولا احنا بنعرض أبحاث ومعلومات 

صلاح: هل يضرنا ان كل كاتب يستخدم الاسلوب ال يناسبه. 

كريم: احنا بنتكلم في مستويين، اللغة والمنهجية البحثية. الي يهمنا أكتر هل هايكون في قسم من صفحة الويكي الكاتب بيقول استنتاج ويقول منهجيته وصل ليه ازاي؟ 

عمر: لو في باحث عمل مجهود انه ينتج معرفة فيها مستوى تحليل بمنهجية سليمة، ليه نمنعه من عرض منهجيته ونتايجه؟ 

عبدالرحمن: ممكن نتفق ان أي رأي يكون cited  ونرجعه لكاتب أو مفكر الناس تقدر تتقفى أثره 

آية : احتمال كبير يكون اختلافنا هو في فهم المصطلحات. تحليل، توثيق، قراية، معرفة أصيلة، معرفة أولية. لو اتناقشنا يعني ايه "تحليل" كل واحد من ال قاعدين هايكون عنده تصور. 

برهام وصلاح وكريم: النقاش سابق لأوانه احنا بنحاول نحط قواعد تحريرية لنصوص مش موجودة. 

اتفق الكل اننا نرجع للمناقشة دي في المستقبل بعد ما نطون انتجنا نصوص تحتمل المناقشة دي على شيء ملموس. 

أمنية بتلم الجلسة ال وسعت مننا

أمنية : نأمل ان النقاش يكون على أرضية. طرح رأي عن الجنترة مثلا ونسبه للمدرسة المركسية، فيكون الرد عليه برأي مضاد من مدرسة مركسية (أو تفريعة منها مثلا نسوية مركسية) أو من مدرسة ليبرالية. يعني يكون نقاش فكري حقيقي مش بضحالة التعريص للنظام أو نقده. 
 
كريم: طرح أسئلة الاستقلالية والاستدامة. اتفقنا ان المواضيع دي كبيرة وتحتاج جلسة منفصلة

انتهى اليوم وتمت مناقشة جدول بكرة، وأولويات المعتكف اليومين الجايين. 

جدول بكرة
9 صباحا الفطار 
10 - 12  الجلسة الأولى 

برهام: الأولوية ممكن تتحول لان الناس تشبك في مشاريع وتبتدي تنتج محتوى فعلا من خلال الجلسات العملية، وتقليل المناقشات وجلسات التدريب (مثال تدريب إضافة المصادر). الجلسة يكون لها أجندة ونكون واعيين بالوقت وتغطية كل النقاط وبالتالي تحديد وقت المناقشة في كل نقطة حتى لو ماوصلناش لجواب نهائي 

زعزع: نوازن بين اننا نناقش النقاشات المهمة وكل واحد ينتج ولو محتوى صغير.

برهام: مقصدش انتاج فردي أقصد انتا جماعي والشغل مع بعض والمناقشة على مشاريع واضحة. 

كريم: هدف الجلسة العملية بكرة ايه؟ (سؤال للفراغ) 


====اليوم الثالث: 9 أكتوبر، الخميس. الجلسة الأولى : 10:00 - 12:00مساءا====

برهام: مشروع العمران والأوبئة

رنوه: الكورونا مكملة معانا لمدة وتأثيرها شديد على حياتنا، فمهم نرصد التغييرات في حياتنا المبنية عليها

طوانسي: وكمان تعريف العمران ممكن يتغير بسببه

كريم: محتاجين نكمل شرح المشاريع.

برهام: بالنسبة للصورة المتحركة والمدينة؟ رايح فين؟

كريم: هو عن علاقة الصورة المتحركة بالمدينة وعلاقتها بالعمران.

مروه: بالنسبة لمشروع برهام عن الروايات المصورة؟ هل ممكن يتحطوا تحت مظلة واحدة؟

برهام: مشروع الروايات المصورة بدأ كمشروع كتب عن إثنوغرافيا العمران، بعد كده تطور للإثنوغرافيات اللي تم تحويلها لكوميكس أو أي نوع تاني من التصوير.
أنا شايف أن بنية الصور المتحركة والقصص المصورة ممكن يتشاركوا في نفس البنية لأنهم شبيهين ببعض.

برهام: بالنسبة لقائمة قراءات عمرانية، ممكن أسأل هو رايح فين؟

أمنية: هو قاعدة بيانات للكتب.

برهام: هل هنضيف مجموعة من البيانات الفوقية كمان لتصنيف الكتب وتقييمها؟

طوانسي: محتاجين الجزء ده من الويكي يكون تفاعلي ويفتح دايرة النقاش من خلال تصويت على الكتب الأفضل أو خلافه.

أبو طيرة: أنا مش شايف ازاي هنجمع كتب مع بعض من غير ما تبقى تحت مصطلح. ساعتها هيتحول لصفحة مصطلح مش كتب 
برهام: دي نقطة قوة لتصنيف الكتب من خلال الموضوع
مروه: هل نصنف المحتوى قبل ما يبقى موجود ونستهدف مواضيع معينة؟ واللا نسيب الموضوع مفتوح ونبدأ نقيس اهتمامات الناس بالمواضيع المختلفة؟
كريم: خلينا نأجل ده لمناقشة المشروع نفسه
أمنية: بالنسبة لنقطة برهام (هل يكون قائمة أو reader). رأيي أن ال reader يكون مبروط بالموضوع من خلال مصطلح معين في تصنيف المصطلحات

مروه: هل " التوحد والعمران" مشروع واللا صفحة؟
كريم: هو صفحة بس ممكن يتحول لمشروع

رنوة: باقترح مشروع عن التعليم العمراني وخلق مساحات للفتية والفتيات. الفكرة من وراه هي التفكير في المواضيع والعلوم اللي كنتم محتاحين كعمرانيين تتعلموها من وقت دخولكم الجامعة أو قبل
برهام: هو مشروع منهج تعليمي بالأساس لتجارب التعليم الشاملة عن العمران. لأن التجارب اللي زي مبتدأ وحتتنا وأضف مش محطوطين جنب بعضهم. هو توثيق وصفحة أكثر ما هو مشروع.

زعزع: بالنسبة لمشروع "توثيق التغيرات العمرانية الراهنة" هو بيتضمن التغييرات الحالي زي مشروعات "مصر بدون عشوائيات أو كهربة القطورات أو الطرق الاقليمية. محتاجين نوثق.
أمنية: متهيألي يتسمى سياسات رسمية عمرانية أو أجندة رسمية عمرانية أو تدخلات الدولة المصرية.
برهام: نسميه بعبصة عمرانية.

كريم: مشروع "نشر ذاتي وإنتاج مطبوعات" هو مش مشروع في الويكي لكنها فكرة لإصدار مطبوعات عن الويكي

كريم: مشروع الذاكرة العمرانية المشتركة في آخر 10 سنوات.
رنوة: الفكرة في ذكرياتنا المتعلقة بالمساحات والاماكن في آخر 10 سنوات. الذاكرة مختلفة طبقًا لمواقعنا خلال ال 10 سنوات بالنسبة لأجيال مختلفة.
كريم: ممكن نبدأ بتوثيق عمل ومبادرات العمرانيين في آخر 10 سنوات. ممكن نبدأ بتوثيق ذاتي.
زعزع: ممكن كمان نضيف كمان عن الكيانات اللي طلعت

روان: توثيق الورش والفعاليات ممكن يدخل تحت مقترح رنوه الأول "التعليم العمراني".
مروه: تغييرات المساحات اللي بتتوجد فيها مبادرات أو الفعاليات وانحسارها من المجال العام ناحية الأماكن الخاصة أكثر.

كريم: الناس كتبت هتشتغل على ايه. هل ممكن ندمج المشروعات القريبة زي "الصورة المتحركة والعمران" و "أنثربولوجيا العمران المصورة" عشان نجمع المهتميت مع بعض أو نركز على المشروع اللي اختاره ناس اكتر؟
برهام: كنت حابب نناقش نطاق عمل كل مشروع قبل ما الناس تختار. شايف أننا نسيب كل الاختيارات المفتوحة
كريم: تمام. هنسيب المشروعات منفصلة ويتم الاتفاق على الإسهام الفردي بين المشاركين.

مروه: ممكن المشروعات الصغيرة تبدأ كصفحة ممكن تتطور لمشروع في المستقبل.
برهام: متفق مع مروه، محتاجين الناس تتناقش في المشروع ومداه الزمني وحجمه قبل ما كل حد يختار مشاريع يشتغل عليها
زعزع: اختيار كل حد فينا هو اهتمام مش التزام، وعندنا كمان صفحات قائمة محتاجة رجلجة.

====اليوم الثالث: 9 أكتوبر، الجمعة. الجلسة الثانية : 12:30 - 2:30 مساءا====

- علي كل مجموعة ان توثق ما توصلوا اليه 

- كل مجموعة كتبت في الورق (خطة العمل - المخرجات - الجدول الزمني - عدد الاشخاص) وتم هذا لكل المشاريع في جلسات قصيرة لمدة ١٥ دقيقة، تم فيها عصف ذهني بين الاشخاص المهتمات بالمشاركة في هذا المشروع. 

====اليوم الثالث: 9 أكتوبر، الجمعة. الجلسة الثالثة : 8:30 - 10:30 مساءا====
كريم: هل في اي مواضيع/افكار حد شايف اننا نتكلم فيها؟ 

صمت

كريم: أجندة: 

استدامة للويكي لل (مجتمع الويكي العمراني - التقني - تمويل مادي) 

الامكانيات المادية

علاقتنا مع المحيط وهل مهتمين بأنواع من الشراكات المختلفة 

التوسع: امتي هنخرة بره القاهرة؟ ولا امتي هنخرج لبلاد عربية تانية؟ 

الهوية البصرية (اللوجو - Layout and interface - الخطوط - الالوان)

الاستقلالية (في مصادر التمويل - ودور اضف وعشرة طوبة)

ايه علاقة شركاء المشروع/ الراعيين له بالمشروع نفسه. 

خلفية عن وضعنا، المشروع اول ما ابتدي قولنا ان من خلال مركز الدراسات العربية ببيروت غطي ورشة مارس وجزء من المعتكف - والفلوس اساسا راحت لأحمد عشان كل الشغل التقني - وجزء لكريم كرمتبه كمنسق. وده خلص في شهر سبتمبر ٢٠٢٠. وعليه انا وزعزع حاولنا نحيب حاجة للعمران والاوبئة، وبعت لحاجتين كمان - بس كله مجاش - وكله مش تقديم علي الويكي - تقديم علي مشاريع اصغر من جوه الويكي. 

زعزع: وعليه التمويل الفردي بقه مقترح ومرحب بيه بشكل اكبر بكتير. 

رنوة: مؤخرا بقه التمويل الفردي هو الشئ المرحب بيه، وعليه كل واحد فيكم يشوف مشروعه الفردي، ويبقي جزء من الويكي. 

مروه: ده ازاي هيساهم في استدامة الويكي؟ 

زعزع: من وجه نظري، انها منفعة زيادة فكرة بني مشاريع فردية من جوه الويكي، الويكي نفسها هتبقي منصة بتلمع المشاريع الفردية نفسها، لانه المشروع ليه منصة للتنفيذ والتحقق والوصول للناس. بحيث ممكن يكون في عائد علي الناس، وميكونش الشغل تطوعي.

كريم: انا فكرت انه ممكن نتمأسس، بس طلع وجود جمعية او مؤسسة شئ مستحيل دلوقتي. لكن ممكن نبقي شركة ذات مسئولية محدودة. او ندخل شركاء مع مجاورة او طوبة بشكل دائم.
 
طيرة: ايه العلاقة بين التأسيس القانوني وبين الحصول علي تمويل وبين الاستدامة؟ نرسمها العلاقة دي عشان تبقي واضحة.

رنوة: لو في عالم مؤسسات التمويل، لو انت كيان قانوني، عندك المساحة بتقدر تاخد تمويلات حقيقية +٢٠، لو ممثلين عن ويكي عمران هيكون +٥

كريم: في تخوف انه يتقال ان المشروع ده بتاع ١٠ طوبة، وده تخوف قانوني، ملوش علاقة بالاستدامة القانونية. 

رنوة: في دينامك ان ده موضوع سياسي وفيها مؤسسات او شركات، وهل ويكي عمران عايزة تبقي مؤسسة زيادة بكل المشاكل اللي بتقابلها، فهمت ان جزء من الامان والاهداف للمجموعة انهم يضموا علي مجاورة او طوبة. 

زعزع: وقتها مش هتبقي جزء من طوبة لانه لازم ينفصل. 

رنوة: هل زعزع موجود اكتر عشان هو من طوبة، هل عشان كده طوبة موجودة ولا لا

عبدالرحمن: اول ما ابتدينا في مواصلة القاهرة، وكنا بين اختيارات مشابهة للي احنا فيه دلوقتي، تحت مظلة قانونية تانية، انه تدخل مستشار مهني بشكل فردي وهكذا، وعليه تتعاون بشكل فردي. لكن لو شركة هتفتح مساحة لتمويل مختلف شويه. والخيار التالت ان في كمؤسسات معينة لازم الويكي يبدأ معاهم علاقات، مينفعش لو احنا شركة بس ينفع لو نتعاون مع جمعية، وليد منصور وريتشارد مثلا (بيمولوا مشاريع لجمعيات بس). 

طيرة: نربط مع ناس تانية

زعزع: او مجاورة في سكة معاها اكتر، في سكة تانية المأسسة. 

طيرة: موضوع المأسسة ملوش لازمة ،صداع، يبقي لازم نلاقي ناس تشيل معانا. 

أمنية: ليه مش اضف؟ 

زعزع: الفلوس جت من خلال طوبة، واضف شريك تقني فقط.

طيرة: يعني احنا دلوقتي كل الفلوس هي بس التقني، والتنسيقي ولو في معسكرات، او اجتماعات وهكذا.

زعزع: هل محتاجين فلوس تاني لايه؟ 

كريم: يعين ٥٠٠ يورو في السنة وتعتبر مدفوعة من اضف دايما عشان البلاتفورم يفضل موجود. كل حد فينا لحد دلوقتي مسئول فيها عن نفسه، لو هنقدم علي تمويلات جديدة، فبقي الناس المسئولين عن المشروع هم مسئولين عن المشروع ونفسهم كمان تمويلا. 

عبدالرحمن: اولويات الانفاق لازم تحدد - زي دعم التقنيين مش بس غربية، بس كمان مع ناس تانية، للتمكين مع نوع محتوي مختلف. والسيانريو التاني لو المشاريع فردية هتتوقف علي ان الناس تجيب تكلفة المشروع او تشتغل تطوعي، وعليه المحتوي هيتطور بشكل تطوعي. 

عمر: هل الشكل البلي احنا متفقين عليه لل ٣ شهور الجايين ممكن يكمل؟

كريم: اه احنا في مشكلة من دلوقتي، هنقدر نكمل شويه اه بشكل تطوعي بس مش بنفس الوتيرة.

رنوة: نفس المؤسسة الل ياد فاند في الاول، من خلال ١٠ طوبة، في دعوة انه ارجعوا قدموا تاني لمدة سنتين ب ٣٠ الف يورو، مين دلوقتي اللي هيقدم؟ هل هيكون من خلال طوبة ولا من خلال طوبة؟ انا بالنسبالي، شايفه ان كريم شايل ده علي كتافه، وغربية مستشار تقني، وزعزع اون اند اوف، وعليه في امكانية موجودة ومحتاج نقاش منكم دلوقتي. 

مروه: سؤال لكريم، ان في الاول كان في دعوة للناس المشتركة في مجال العمران، وانه ماستاجبوش للدعوة، تكوين او مجاورة او ما الي ذلك. 

كريم: ده حصل قبل ما يكون في ويكي، كان في دعوة لتكوين وكلاستر ومجاورة وناس متسقلين ومواصلة القاهرة، اللل ايتسجابوا منهم هم مكتب دينا شهيب، وعمر نجاتي، وناس من اتش بي ار سي. كريم ابراهيم ومي الابراشي قالوا انهم مهتمين يسمعوا عن المشروع بس لسه محصلش. 

طيرة: الجرانت اللي جايه دي هيفوس؟ هل لازم طوبة اللي تكمل

رنوة: اه - انتوا كلكوا ويكي عمران، وعليه سؤال مروه يودينا لمجهود فردي يتعمل مننا كلنا عشان المشروع يكمل، وعليه كل واحد فينا محتاج يفكر ان ده مشروعه. بحيث ازاي ده يكبر، فعلا مش هيحصل. ومش هيستدام. 

كريم: قبل المعتكف، الفكرة ان في فريق محوري، وكان فريق مركز في الاستدامة، اللي هو غربية وكريم وزعزع، وبعدين بقه كريم وزعزع. دلوقتي مين الناس اللي قادرة تبقي جزء من الفريق من المحوري. وعليه هل الموجودين عندهم يقدر يستعد يقوم بالمجهود ده. 

عبد الرحمن: انا كونسبت نوتس وفاندينج ممكن اعمله. 

رنوة: مش فكرة مين مستعد، علي قد مين عنده امكانيات. 

صلاح: كل اللي بتقوله ده جديد عليا تماما، وعليه فكرة الامكانيات اللي عند الناس مهمة جدا، وعليه ايه الحرف اللي عند الناس وعليه نقدر نبني عليها. 

مروه: عليه ممكن نشوف ايه المطلوب ونحاول نبني ايه المهارات اللي عندنا ونبدأ نتحرك منها

صلاح: امبارح كان عندنا وضوح اننا اه محتاجين فاند، بس كان عندنا تخوفات من الاستقلال وهكذا.

أية: احنا بنحكي علي حاجة محددة وهي الفاند اللي محتاجينه للسنتين الجايين، وعليه في ادوار محددة محتاجة تتعمل، وعليه الادوار تتحدد بمدة زمنية، وفي النص سمعت كلمة تنسيق، وبالنسبالي في الويكي، المهارات اه ناس دماغها فهمت الويكي، واديها ودماغها خدت ع الويكي، وعافه تساعد غيرها كمان، ومهارج يلا نفكر في المحتوي ونطور في الويكي. وبقينا شويه بدينا نفرق بين الادوار المختلفة اللي ممكن تكون عند كل حد فينا. وعليه مثلا مروه هتسوق موضوع التشبيك، لكن كلنا بنقول لمروه علي اقتراحات لفرص التقديم علي فاند ونقول لعبد الرحمن مثلا. ولو حد اتطوع عشان حد عنده الشغف للعمل ده يبقي يا ريت. ومنمشيش من هنا الا ال ٦ شهور الجايين مين عنده وقت وطاقة وهيعمل ايه. 

صلاح: كلام أية كان لطيف في فكرة في مين الفريق المحوري، وعليه مشكلة الفترة الجايه، لازم يتجدد فيها المين الفريق المحوري. وعليه يكون في خطة طوارئ،

كريم: هل حاسين ان المشروع ده ممكن يتسديم لو ٧٠ ف يالمية مننا متطوعين؟ وهل الناس هتحس بعدم عدالة، وعليه يكون في عدالة لو جه فاند، وعليه لو حد معندوش مهارات يبقي مين في الفريق المحوري. 

عبدالرحمن: تحديد اولويات الانفاق مهم تاني جدا، ومش لو حد عنده شغف ممكن ميكونش عنده مهارات. وبعدين نشوف مين تطوعي ومين لا. 

أية: في فاند للويكي، وعليه فكرة عبدالرحمن منطقية جدا، وعليه نشوف المسئوليات المشتركة، وفكرج المشاريع الفردية فكرة تانية خالص. 

زعزع: لو الناس شايفة اننا المفروض نكمل زي ما احنا؟ قولولنا بحيث نكمل زي ما احنا، ولو عايزين تشيلوا ايديكم قولوا وخليكم بره الحاجات.

كريم: هل فعلا نتبع موضوع اولويات الانفاق من دلوقتي. 

طيرة: في كده سؤالين: في اولوليات للانفاق؟ وهل لو جه فاند لمشروع بعينه هتتوزع ازاي وعلي مين؟ فدول سؤالين. 

رنوة: في شخصين كانوا شغالين علي الاوبئة، وهم اللي جابوا الفاند، وصادف ان الفلوس جت بس هم معندهومش وقت ليه في السنة دي، يبقي المجموعة دي كلها بتشتغل بحماس وبشكل تطوعي، ولو تقدروا تتكلموا عن الوقت الشهري للتطوع وهيبقي قد ايه لو هيكون ممول. 

طيرة: وعليه اولويات الانفاق: تنسيق (يشتمل علي التقديم علي تمويلات) - التقني - نشاطات - الناس اللي بتكتب.
لو قدمنا بقه علي منحة وجت، مين ياخد ومين لا.

صلاح: يبقي حسب مين اللي قدم ومين اللي هيكتب، وفي فلوس للتنسيق. 

برهام: يفضل ان كل مشروع يقدم علي جرانب بنفسه، ويقدم جزء من الفاند ده للويكي (للراس). ولو هنرحع للفورمات القديم، لازم طوبة اللي هتقدم عشان تبقي بتكمل علي مشروع. 

زعزع: ينفع طوبة تكمل وتمام، بس احنا حابين ام المشروع ميكونش ملكيته لطوبة اصلا، ويكون فيه شركا من مؤسسات تانية. 

برهام: عليه كلنا ممكن نشتغل في اتجاهين، اتجاه المنحة الكبيرة، واتجاه المنح الاصغر. المجاميع الاصغر تشتغل علي منح لمشاريعها الاصغر

مروه: في طرح ممكن يبقي في مشكلة في التمويل الفردي للتمويل الكبير، وعليه مين المجموعة الاكبر اللي ممكن تجيب فاند كبير، سؤال ملوش لازمة. ومفيش اي استغناء علي تنسيق، كلهم مشاريع ويكي صغيرين، وعليه اولويات الانفاق هتروح لمجموعة التنسيق وتاني هنعمل مجموعة صغيرة، وعليه بقية المجاميع تشوف عايزة تبقي تطوعية ولا لا، وعليه التنسيق مش كريم، يا اما تنسيق داخلي، منسق عام وتقني عام داخلين فيه، ولكن فيه دايما مشكلة في التقنيات.

كريم: اي فاند هيتقدم من خلال طوبة او مؤسس الويكي او او او ، دايما هيكون في اولويات، وعليه انواع المحتوي اللي بنتناولها وعليه هنوزع الميزانية ازاي، ولازم نشوف المهام ونوعيتها ونحط المعايرر اللي ترسم ميزانية. 

أية: يعني يا جماعة مين هنا قاعد مهتم يكون من الفريق المحوري وياخد فيه دور قيادي؟ 

أمنية: انا شايفه انه فيه شئ محوري ظالم حوالين فكرة المسئولية القانونية واللي لازم توضيحها لكل اللي قاعدين. احنا مش بحتل نفس المواقع ولا عندنا نفس المواقع ولا الخبرات ولا الوعي بالمخاطر المهنية والقانونية لاهخد خطوات زي دي.

أية: مين الناس اللي عندهم استعداد يكونوا موجودين في التمويلات الكبيرة؟ وهي تبع مؤسسة ما. مين هيكون عنده القدرة علي الزق في ده. 

زعزع: القلق انه مش يبقي الناس مهتمة اصلا تبقي جزء من قرارات رئيسية. 

رنوة: الية اتخاذ القرارات محتاجة تبقي واضحة ومتفق عليها، ان في اربعة مثلا بيتناقشوا وبياخدوا قرارات وهكذا. ويطلعوا باقتراحات ويتناقشوا مع بقية الفريق. وعليه نوصل انه ازاي نقدر ننظم نفسنا وواعين ان اي مشروع محتاج ده وده وده، وفي اليات لاتخاذ قرار وهكذا. 

كريم: اللي انا حتاسه انه لو في فريق محوري فيه كام حد اساسين، انه في ناس مش هياخدوا المسئولية القانونية نتيجة لوجود المؤسسة المسئولة. وفي درجات تانية من التواجد في المشروع، وعليه في فرق للمشاريع وهكذا، مفيش اي زق ان اي حد يكون في الفريق المحوري.

برهام: المجموعة دي محتاجة تتقسم مجموعتين، مجموعة كتابة تمويلات لويكي عمران، وبعدها المجموعة التانية مجموعة تنسيقية، عشان مش منطقي التنسيق والتشبيك والتدوير علي مؤسسات ندخل ضمنها، وده هيحتاج مجموعة. وعليه في الحالة دي يبقي الناس تقرر تبقي في واحدة في مجموعة حسب مهاراتها. واقتراح القعدة بتاعت المشاريع من الجلسة التانية، ان كل واحد فينا عارف دوره في مشروعه وممكن ع التوازي ان مجاميع صغيرة تعرف تلاقي تمويلات صغيرة في الويكي وهكذا. وده اللي انا طلعت بيه من الساعة ونص اللي فاتوا. 

زعزع: ده كان موضوع مؤرق كده كده، وفيها حساسيات وازاي تتشارك مع الجميع

برهام: في نقطة ناقصة في الجلسة دي، نبدأ ان جزء من الاستدامة ان الكل يبقي مققر هو متطوع ولا لا. بحيث ميوقعش المشروع في المستقبل.

كريم: كان لازم نتكلم بشكل مفتوح ويحصل خلافات عشان نفهم احنا فين وهنعمل ايه، وان فيه اتفاق ضمني ان لو الحاجات مفيهاش فلوس هنكمل تطوعي.

تقييم لليوم: 
عموما هايل والجلسة التانية للمشاريع كانت هايلة جدا، في بعض النقاط المؤجلة بس مش كبيرة. 

غدا: 
وضع خطة لل ٦ شهور اللي جايه، ويمكن يكون في معتكف في يناير. 

====اليوم الرابع: 10 أكتوبر، السبت. الجلسة الاولي : 11 صباحا - 1 مساءا====
كريم: محتاجين نعرف الادوار؟ ونقسم المهام؟ ونعمل خط زمني؟ ونشوف هل هنتقابل الفترة الجايه ولا لا؟ وتقييم للمعتكف وهل هنكرره ولا لا؟

١- الادوار المطلوبة :

-دعم تقني (أحمد غربية وميسرة)

-ميسرين تقنيين (زي دور أية وكريم في المعتكف حيث انهم فاهمين شويه حاجات عن التقنيات وممكن يساعدوا اكتر كل الناس اللي بتضيف في المحتوي) (ريم - صلاح - أية - كريم)

-منسق مشروع الويكي (اجتماعات دورية سواء شهرية او اسبوعية - تربيط الفهارس والمشاريع ببعضها) (كريم - زعزع - برهام وأمنية في تربيط المشاريع - أية هتساعد قدر الحاجة - مروه) 

-تمويل واستدامة وميزانية (عبد الرحمن - كريم - زعزع)

-متابعة الادار المالية (زعزع - كريم)

-محررة (تربيط المحتوي ببعضه - مراجعات الروابط) (برهام - صلاح - أية - ريم - كريم - أمنية)

-مراجعة المحتوي (سياسات) (صلاح - أية)

-مراجعة لغوية (أية - طيرة - مروه)

-مطورة محتوي (عبد الرحمن - روان - زعزع - مروه - عمر - احمد طارق - غادة - هبه - برهام - طيرة - كريم - ريم - أمنية)

-الهوية البصرية (عمر - روان - كريم)

2- الجدول التنظيمي لخطة العمل: 
صورة من الفليب شارت.
[[ملف:المعتكف - صورة لخطة العمل الزمنية.jpg|تصغير|مركز]]

3- الخط الزمني: 
- جلسات الاتنين الاسبوعية ملغية 

-تنسيق الجلسات الاسبوعية بتاعت كل مجموعة في كل مشروع مسئوليتهم الجمعية.

-جلسة شهرية اول سبت - يوم عمل كامل - كلنا مع بعض - للتتشبيك وسياسات التحرير وخطط العمل وما توصلنا اليه وما الي ذلك. 

-مكان اضف مفتوح طول الوقت لاي اجتماعات كبيرة او صغيرة - طوبة مفتوحة يوم الحد والاتنين في المنيل لو عايز يشتغل هناك ينسق مع كريم او زعزع. 

4- تقييم المعتكف: 
زعزع: انا سعيد ومبسوط، ومعنديش سلبيات بعينها. لو ده ممكن يتكرر، يكون في توزيع الجلسات بشكل مختلف، بنجري طول الوقت، كان في رايح جاي كتير. كنا محتاجين وقت اطول وضغط ااقل. الهاي لايت، انه برضه في ناس اول مرة اكون معاها وحسيت براحة كبيرة، وبشكل عام المكان مريح والصحبة هايلة. وعلي مستوي المشروع تقييمي كصانع محتوي في الويكي، انا شايف ان ده معتكف كان ناجح ينتج مناقشات وخناقات وصولا لثقة ونقط واضحة وحماس لتكملة الشغل كويس.

ريم: المدة الزمنية كانت كافيين جدا. الهاي لايت، دايما اجتماعتنا في الويكي كانت بتكون دوشة وباطلع منها قلقانة وحاسه انه مش فاهمه اوي، المرة دي الحقيقي الحاجات كانت مريحة وواضحة وبخطة عمل واضحة ومنظمة وده مريح جدا وواضح للفترة الجايه. وكل الشغل ولمساحات الشخصية كانت هايلة ومبسوطة ومحتاجة اشكر كريم وزعزع للتنظيم ولترتيب كل حاجة. 

كريم: المدة الزمنية معقولة جدا، كنا محتاجين نسهر سوا اكتر يمكن ونعمل نشاط اجتماعي اكتر، النشاط الاجتماعي كانت محتاج وقت اكتر. التحضير ممكن ياخد وقت اكتر لتصميم الايام. محتاجين ناس اكتر للتيسير. الهايلايت بتاعي انه الفشيخ في ده ان المكان ده انا مرتبط بيه ووجودنا فيه شئ ممتع ومبسوط اننا اتجمعنا هنا. 

مروه: يمكن مخدناش وقتنا في التحضير، ومكنش هينفع نتفادي المشاكل بتاعت معتكف اول مرة. وعليه دلوقتي في تجربة وخبرة للتجهيز للي جاي. الهاي لايت انه باشكركم كلكم تاني جدا، بس الحقيقة بشكل شخصي كان عندي هم كبير اني اشوف ناس واعمل حاجات وكده، وخلتوني انسي الهم واتبسط معاكم لدرجة اني فصلت خالص ووصلت لمستوي راحة وشغف بسببكم كلكم. ولما بافكر في الويكي قبل المعتكف، شايفه ان المشروع في اربع ايام، الحقيقي اتطور جدا جدا وقربنا مع بعض حتي لو نقاشات فلسفية وصعبة بس كانت مهمة خالص للنتايج اللي وصلنا ليها. وهيكون كده عندي قدرة اكبر علي الالتزام بالمشروع لاني فاهمه احنا فين ومتحمسة اوي اوي ودي حاجة مش سهلة تحصل. عندي حاجة بس كان عندي استفسار اكتر لرنوة لتوضيح اكتر لودرك في المعتكف وفي المشروع، عدم حضورك وحضورك، فهل انتي عضوة في الويكي، بس بتشتغلي في الويكي، وعليه كنت اتمني وضوح اكتر لوجودك. 

أية: كنا محتاجين يوم زيادة بس حسب الاهداف، لو عايزين يوم زيادة عشان نشتغل ب ادينا اكتر. الهاي لايت، انه قلقت لما الناس اول ليلة قالت اننا مش مشتبكين اوي ومش شغالين فمش هاتكلم اوي وهاسمع اكتر، والجميل انه من تاني يوم كلنا بقينا بنتكلم وحطينا قلبنا وعقلنا سوا وده كان شئ ايجابي جدا. ومبسوطة اوي لتقاطعي معاكم، والهمتوني لويكي جندر جدا، وعامة انا كنت مرتاحة بشكل نفسي وجسدي ودي حاجة كبيرة، وكان في طاقة محبة مستمرة وعطاء. وممتنة للنا ساللي جت نكشتني واتكلمت معايا، وشكرا جدا للناس اللي راحت السوق بشكل خاص ليهم.

عمر: النقاش مكنش فيها تفاعلات او العاب تخلينا نتكلم بطريقة مختلفة، وكان ممكن يكون في شغل اكتر علي الكمبيوتر، سيشن كاملة كجلسة عمل بشكل فردي. الهي لايت، علي مستوي الويكي، انا مبسوط لاني استعد حماسي في كلامنا ورايحين بيه لفين. وناس ممكن تبقي معاك وتكمل معاك، وبشكل شخصي مبسوط اني باتعرف عليكم اكتر وباعرف ناس جديدة. 

صلاح: مفيش حاجة سلبية مضيقاني، بس الجدول محتاج يبقي ماسك نفسه اكتر، مش للتحجيم للديناميكيات، والدينيميكيات اللي حصلت في الورشة معملتش اي اعاقات بالعكس ساعتدنا، بس برضه لو في جدول متنظم اكتر ومواضيع الجلسات اوضح هيكون احسن للمعتكف الجاي، وباشارك مروه انها تجربة اول مرة. الايجابيات كتيرة، هو تواصلنا اكيد، بس دلوقتي في تواصل مختلف، وشكرا لكل الناس اللي ساعدت واتمرمتط. والهاي لايت علي مستوي الشغل مبسوط جدا ومكنتش ده اللي جاي عليه بس احسن كتير، والمستوي الانساني، ممتن لكريم انه قرر يستضيفنا في مكان ليه معني كبير بالنسباله. واخر حاجة بحبكم جدا وان كلكم ظرفين ولطيفين.

أمنية: ممتنة لوجود داعمين وداعمات في المشروع ده، واننا علي ارضية مشتركة كبيرة، وان في احترام بينا ومفيش احكام رغم اننا جايين من حتت مختلفة.

عبد الرحمن: انا مبسوط بالمعتكف، المجموعة دي مريحة، وفي حاجات مفهومة من غير ما نتكلم وعندنا ارضية مشتركة. والاحترام اللي بينا. والجزء الوحيد اللي محتاجة شغل هو شد الناس للجدول والتحضير اكتر. 

رنوة: ممتنة انكم سمحتولي اكون موجودة، وتقبل وجودي وحضوري، وفي حماس للشغل هايل، وصحتوني بالهامكم، وبشكل شخصي شكرا لصلاح وعمر عشان لعبوا شطرنج مع رامي. واني عرفت اقعد اتكلم شويه مع أية. وحسه انه كل ٣ شهور نعمل حفلة في الزمالك للتواصل يبقي هايل. اعتراضي اننا مرقصناش.

طيرة: انتوا قولتوا كل حاجة خلاص يعني، اكل زعزع حلو. المعتكف كان كويس وكان في توازن كويس ما بين الشغل والفسح واللعب. اشتغلنا كويس، واتفسحنا والحاجات كانوا كويسين وحاجة قلما ما بتضبط كده. عادة بيكون مفيش توازن. وشيشنا ولعبنا فكله كان حلو فعلا.

برهام: انا شحنت والمعتكف ده اتمني يتكرر ويكون اطول وساعتها نكمل شغل سوا، احلي حاجة اننا هنا بنسيح في المناقشة وبعدين نطش في الميه ونرجع نكمل. انا محظوظ اني جزء م المجموعة دي فكريا وشخصيا.

روان: معتقدش عندي حاجة سلبية، وجلسه امبارح شرحتلي ووضحتلي حاجات كتيرة للمشروع وتقسم الشغل.



[[تصنيف: المعتكف الأول]]